Ekkert jólafrí hjá Birki og félögum

Liðin í ítölsku B-deildinni í fótbolta fá ekkert jólafrí, en heil umferð fór fram í deildinni í dag.

Birkir Bjarnason lék allan leikinn fyrir Pescara sem vann 2-0 sigur á Varese á heimavelli. Riccardo Maniero (vítaspyrna) og Federico Melchiorri skoruðu mörkin í sitt hvorum hálfleiknum.

Þetta var 16. leikur Birkis með Pescara á tímabilinu, en liðið er ósigrað í síðustu fimm leikjum og situr í 13. sæti deildarinnar.

Pescara á eftir að leika einn leik á árinu 2014, en á sunnudaginn sækja Birkir og félagar Livorno heim.