Góður sigur hjá Milan í síðasta leik dagsins

AC Milan lyfti sér upp í sjötta sætið í ítölsku úrvalsdeildinni í fótbolta með 2-0 sigri á Napoli á San Siro í kvöld. Jérémy Menez og Giacomo Bonaventura skoruðu mörkin í sitt hvorum hálfleiknum.

Þetta var fjórði leikur Napoli án sigurs, en liðið er í 7. sæti með jafn mörg stig og Milan, en verra markahlutfall.

Fyrr í kvöld tapaði Cesena fyrir Fiorentina á heimavelli með fjórum mörkum gegn einu. Hörður Björgvin Magnússon sat allan tímann á varamannabekk Cesena.

Svartfellski varnarmaðurinn Stefan Savic skoraði fyrir bæði lið í kvöld, en sjálfsmark hans kom þó ekki að sök. Borja Valero, Gonzalo Rodríguez og Mounir El Hamdaoui skoruðu hin mörk Fiorentina sem er í 8. sæti með 23 stig.

Cesena er hins vegar í 19. og næstneðsta sæti með aðeins átta stig.