Guðdómlegar gyðjur og hvirfilvindar kynþokkans

Bartónar, karlakór Kaffibarsins, og kvennakórinn Katla blása til jólastórtónleika í Austurbæ á fimmtudag.

„Guðdómlegar gyðjur og hvirfilvindar kynþokkans,“ segja kórarnir á plakatinu fyrir tónleikana og skafa ekki af því.

Kórunum stýra þau Jón Svavar Jósefsson (Bartónar), Hildigunnur Einarsdóttir og Lilja Dögg Gunnarsdóttir (Kötlur). Þessir kórstjórar eru ekki af verri endanum en bæði Jón Svavar og Hildigunnur eru tilnefnd til Íslensku tónlistarverðlaunanna í flokknum Sígild- og samtímatónlist, sem söngvari og söngkona ársins.

„Bartónar og Kötlur sameina söngkrafta sína og flytja jólalög úr ýmsum áttum, þjóðleg og óþjóðleg, hæg og hröð, há og lág, súr og sæt, mjúk og hörð. Taumlaus jólagleði, jólakötturinn lætur sig ekki vanta og það er aldrei að vita nema einhverjir jólasveinar láti sjá sig,“ segir í kynningu fyrir tónleikana.

Tónleikarnir eru til styrktar Hugarafli, sem hefur undanfarin 11 ár unnið ötullega að því að bæta okkar geðheilbrigðiskerfi og stuðlað að breyttu viðhorfi almennings til geðheilbrigðis, með virðingu og mannréttindi að leiðarljósi.

Þeir fara fram í  Austurbæ þann 18. desember klukkan 20. Hægt er að nálgast miða á midi.is.