Ronaldo með þrennu í auðveldum sigri

Cristiano Ronaldo skoraði þrennu þegar Real Madrid lagði Celta de Vigo 3-0 í spænsku úrvalsdeildinni í fótbolta í kvöld.

Ronaldo skoraði fyrsta markið úr vítaspyrnu sem hann fiskaði sjálfur þegar fjórtán mínútur voru til hálfleiks.

Staðan í hálfleik var 1-0 og þannig var staðan allt þar til á 65. mínútu þegar Ronaldo skoraði aftur. Ronaldo fullkomnaði þrennuna þegar níu mínútur voru til leiksloka.

Þetta var 23 þrenna Ronaldo fyrir Real Madrid í spænsku úrvalsdeildinni. Enginn hefur skorað fleiri þrennur í deildinni.

Ronaldo hefur nú skorað 23 mörk í 14 leikjum í deildinni í vetur en Real Madrid var að fagna 18. sigri sínum í röð í öllum keppnum.

Real Madrid er á toppi deildarinnar með 36 stig, fjórum stigum meira en Atletico Madrid. Celta de Vigo er með 20 stig í 8. sæti.