Liverpool á enn von þrátt fyrir jafntefli í Búlgaríu | Sjáðu mörkin

Liverpool á enn von um sæti í 16-liða úrslitum Meistaradeildar Evrópu þrátt fyrir 2-2 jafntefli gegn Ludogorets í B-riðli keppninnar í kvöld.

Heimamenn í Ludogorets komust yfir snemma leiks eftir slæm mistök Simon Mignolet í marki Liverpool en gestirnir voru aðeins fimm mínútur að jafna metin. Rickie Lambert var þar að verki og þakkaði þar með traust þjálfarans Brendan Rodgers með því að skora sitt fyrsta Meistaradeildarmark.

Jordan Henderson kom svo Liverpool yfir á 37. mínútu og leit lengi vel út fyrir að það myndi reynast sigurmark þeirra ensku í kvöld. En Georgi Terziev jafnaði metin með skallamarki skömmu fyrir leikslok.

En þökk sé sigri Real Madrid á Basel í hinum leik riðilsins í kvöld dugir Liverpool sigur á Basel í lokaumferð riðlakeppninnar í næsta mánuði til að komast upp í annað sæti riðilsins og komast áfram í 16-liða úrslitin.

Dani Abalo kom heimamönnum yfir gegn Liverpool: Rickie Lambert jafnaði metin aðeins nokkrum mínútum síðar: Jordan Henderson kom Liverpool 2-1 yfir: Heimamenn jöfnuðu metin undir lok leiksins: