Fellibylurinn Kalmaegi fór yfir Hong Kong

Aflýsa þurfti rúmlega fimmhundruð flugferðum á flugvellinum í Hong Kong í nótt þegar fellibylurinn Kalmaegi fór þar um. Hlutabréfamarkaðnum í Hong Kong var einnig lokað í morgun vegna veðursins og skólar og fjölmennir vinnustaðir voru einnig tómir.

Fremur lítið tjón varð þó af storminum á Hong Kong þótt tugir hafi slasast en sex fórust þegar ferja sökk við Fillipseyjar á laugardag þegar sama veður gekk þar yfir. Nú stefnir vindurinn inn á meginland Kína.