Þekktur steralæknir heimsótti Tiger fjórtán sinnum

Í nýrri bók um steranotkun hafnaboltamannsins Alex Rodriguez kemur kylfingurinn Tiger Woods óvænt við sögu.

Íþróttalæknirinn Anthony Galea er maðurinn sem sá Rodriguez fyrir sterum og vaxtahormónum. Árið 2011 játaði hann að hafa flutt vaxtarhormón og önnur ólögleg lyf til Bandaríkjanna í þeim tilgangi að aðstoða atvinnumenn í íþróttum.

Í nýju bókinni kemur fram að Galea hafi heimsótt Tiger fjórtán sinnum frá janúar fram í ágúst árið 2009. Þá var Tiger að jafna sig eftir aðgerð á hné.

Félagi Galea, Mark Lindsay, heimsótti Tiger einnig og alls 49 sinnum frá september 2008 fram til október ári síðar.

Þarna var Tiger að glíma við sín erfiðustu meiðsli á ferlinum líkt og Rodriguez. Þá minntust þeir stundum á tímamótalækningar kanadískra lækna sem þeir fóru til. Það voru þeir Galea og Lindsay.

Menn velta því eðlilega fyrir sér hvort Tiger hafi verið að nota ólögleg efni á þessum tíma en fyrrum þjálfari hans, Hank Haney, er ekki á því.

"Ég var þarna og fylgdist með öllu. Það fór ekkert í líkama Tigers sem fór ekki úr honum aftur. Ég trúi því algjörlega að Tiger hafi aldrei notað ólögleg efni," sagði Haney sem hefur nú ekki alltaf vandað Tiger kveðjurnar síðan hann var rekinn fyrir fjórum árum síðan.