Saka leikmann Grundarfjarðar um að kýla og hrækja á leikmann Berserkja

Berserkir voru óánægðir með háttsemi framherja Grundarfjarðar eftir leik liðanna í 3. deild karla í gær. Leiknum lauk með 2-1 sigri Grundarfjarðar.

Á Facebook-síðu Berserkja er Kristinn Aron Hjartarson, leikmaður Grundarfjarðar sakaður um að hafa kýlt Jason Má Bergsteinsson og hrækt framan í hann í þokkabót þegar leik var lokið.

Kristinn var tekinn af velli skömmu eftir sigurmark sitt á 86. mínútu en hann fékk gult spjald við að fagna marki sínu. Aðeins einni mínútu síðar fékk Ragnar Smári Guðmundsson rautt spjald í liði Grundarfjarðar en hiti var í mönnum eftir leik.

Berserkir saka Kristinn um að hafa haldið áfram á leiðinni inn í búningsklefa. Ljóst er að um alvarlega ásökun er að ræða sem verður vonandi leyst í skýrslu dómarans.

Kristinn þvertók fyrir þessa sögu en vildi ekki tjá sig mikið um málið í samtali við fotbolti.net í dag. „Þetta er bara bull og vitleysa en það voru pústrar eftir leik,“ sagði Kristinn Aron.

Af Facebook síðu Berserkja:

„Eftir leik gerðist leiðindaatvik sem við vonumst eftir að Knattspyrnuyfirvöld og Grundfirðingar sameinist um að koma í veg fyrir að komi fyrir aftur. Á leið inní klefa urðu orðaskipti milli leikmanns Berserkja og Kristins Arons Hjartarson sem endaði með því að Kristinn kýldi hinn dagfarsprúða og krúttlega Jason Varnarbuff í hnakkann og hrækti framan í hann. Þetta gerði hann fyrir framan 7 ára gamlan dreng sem nærstaddir sögðu vera son hans. Okkur þykir ótrúlegt að fullorðinn maður hagi sér svona og þá sérstaklega án áfengis og vímuefna og fyrir framan börn. Þetta atvik er Knattspyrnufélagi Grundarfjarðar og bæjarbúum öllum til skammar. Berserkir bíða því spenntir eftir skýrslu dómarans og hvort að viðkomandi leikmaður verði ekki örugglega settur í bann af KSÍ.“