Emil í byrjunarliði Verona í sigri á Genoa

Emil Hallfreðsson var í byrjunarliði Verona og spilaði nær allan leikinn í 3-0 sigri liðsins á Genoa í Serie A í dag. Gamla brýnið Luca Toni skoraði tvö af mörkum Verona.

Birkir Bjarnason sat allan tímann á varamannabekknum þegar Sampdoria gerði markalaust jafntefli við Fiorentina á heimavelli.

Þremur öðrum leikjum er lokið í Serie A í dag. Roma bar sigurorð af nýliðum Sassuolo 2-0, með mörkum frá Mattia Destro og Michel Bastos. Rómverjar sitja í öðru sæti deildarinnar.

Þá vann Torino Cagliari 2-1 á heimavelli og Lazio sigraði Parma með þremur mörkum gegn tveimur.

Í kvöld mætast svo Napoli og Juventus í stórleik umferðarinnar.