Aron Rafn og Heimir Óli hirtu toppsætið af Ólafi og félögum

Guif frá Eskilstuna vann stórsigur á toppliði Kristianstad, 34-21, í sænsku úrvalsdeildinni í handbolta í kvöld og um leið skaust Guif, sem þjálfað er af KristjániAndréssyni, á topp deildarinnar.

Sex mörkum munaði á liðunum í hálfleik, 17-11, en í þeim síðari héldu heimamönnum engin bönd og gjörsamlega keyrðu þeir yfir toppliðið.

Landsliðsmarkvörðurinn Aron Rafn Eðvarðsson sneri aftur eftir meiðsli í kvöld og varði mark Guif en hann missti af tveimur síðustu leikjum liðsins vegna meiðsla í hásin.

Heimir Óli Heimisson skoraði þrjú mörk fyrir Guif í leiknum en Ólafur Guðmundsson, sem farið hefur á kostum í deildinni í vetur, skoraði fjögur fyrir Kristianstad.

Guif jafnaði Kristianstad að stigum með sigrinum og hafa þau nú bæði 41 stig. Markatala Guif er þó mun betri eftir stórsigurinn í kvöld. Kristianstad á þó leik til góða á Guif og getur náð toppsætinu aftur.