Sextán ára Húsvíkingur til Stabæk

Ásgeir Sigurgeirsson mun á næstu dögum skrifa undir þriggja ára samning við norska úrvalsdeildarfélagið Stabæk.

Þetta kemur fram á 640.is en þar segir einnig að Pálmi Rafn Pálmason, fyrrum leikmaður Stabæk, sé frændi Ásgeirs. Pálmi Rafn er nú á mála hjá Lilleström.

Stabæk er nýliði í norsku úrvalsdeildinni en eftir að liðið varð Noregsmeistari árið 2008 hefur félagið átt í nokkrum fjárhagserfiðleikum.

Ásgeir mun fyrst um sinn spila með unglingaliði Stabæk en hann á að baki 41 leik með meistaraflokki Völsungs og hefur hann skorað í þeim níu mörk. Hann á einnig að baki leiki með yngri landsliðum Íslands.