Kolbeinn nær ekki metinu hans Péturs

Það er ekki langt síðan Alfreð Finnbogason sló markamet Péturs Péturssonar yfir flest mörk Íslendings á alþjóðlegum vettvangi á einu ári en annað markamet kappans er öruggt í bili að minnsta kosti eftir leik Íslands og Rússa á Spáni á miðvikudagskvöldið.

Kolbeinn Sigþórsson átti möguleika á því að jafna tæplega 23 ára met Péturs í Rússaleiknum en með því að skora hefði Kolbeinn skorað í sínum fimmta landsleik í röð.

Pétur skoraði í fimm landsleikjum í röð á árunum 1987 til 1990 en á þessum árum setti landsliðsþjálfari Íslands hann út í kuldann og því lék Pétur ekki landsleik í rúm tvö ár. Hann skoraði hins vegar tvö mörk þegar hann sneri aftur og enn fremur í þremur næstu leikjum á eftir.

Kolbeinn var á móti Rússum að spila sinn fyrsta landsleik síðan í ágúst eða þegar hann skoraði bæði mörk Íslands í 2-0 sigri á Færeyjum. Hann hafði enn fremur skorað í þremur fyrstu leikjum sínum fyrir Lars Lagerbäck.