Gefa miða á stærstu danshátíð heims

"Þetta er stærsta danshátíð í heimi þar sem um 250 af frægustu plötusnúðum heims, frá 75 mismunandi löndum, spila tónlist í þrjá daga," segir plötusnúðurinn Ólafur Geir Jónsson um danshátíðina Tomorrowland, sem er haldin í Belgíu í lok júlí ár hvert. Um 200.000 miðar eru í boði á hátíðina, sem yfirleitt seljast upp á örfáum klukkutímum. "Það voru um 100 Íslendingar sem ætluðu að fara í hópferð í fyrra en svo fengu bara örfáir þeirra miða. Þetta er svakalega stórt og stækkar bara með hverju árinu, en þarna er að finna öll stærstu nöfnin í bransanum," segir Ólafur Geir, en á meðal þeirra sem þeyta skífum á hátíðinni eru David Guetta, Tiesto og Swedish House Mafia.

Ólafur Geir stjórnar útvarpsþættinum Music Matters öll laugardagskvöld á útvarpsstöðinni Flass og ætlar þátturinn í samstarfi við Smirnoff að gefa fimm miða á hátíðina, með flugi og öllu tilheyrandi. "Þátturinn stendur fyrir sérstökum Music Matters-partíum mánaðarlega fram að hátíðinni og þar verða ferðirnar gefnar. Allir sem kaupa sér miða inn á kvöldin fara í pott og svo er einn dreginn út. Ég verð að spila á þessum kvöldum, sem verða haldin víðs vegar um landið," segir Ólafur Geir. Fyrsta kvöldið verður næstkomandi laugardag á Úrillu Górillunni á Höfða og opnar húsið á miðnætti.- trs

Hér má skoða upplýsingar um atburðinn á Facebook.