Sara og Þóra tilnefndar sem bestu leikmenn

Landsliðskonurnar Sara Björk Gunnarsdóttir og Þóra Björg Helgadóttir hjá LdB Malmö eru tilnefndar sem besti miðjumaður og markvörður í sænsku deildinni í ár.

LdB Malmö varð sem kunnugt er meistari í ár en liðið átti frábærri velgengni að fagna að loknu Evrópumótinu í Svíþjóð í sumar. Liðið hafði betur í baráttu við Tyresö á toppnum.

Sara Björk er einn þriggja sem koma til greina sem miðjumaður ársins. Hún keppir við liðsfélaga sinn Ramonu Bachmann, sem lék Ísland grátt í 2-0 sigri Sviss á Laugardalsvelli í september, og Caroline Seger hjá Tyresö.

Þóra fær samkeppni frá Kristin Hammarström hjá Kopparberg/Gautaborg og Malin Reuterwall hjá Umeå.

Verðlaunaafhending fer fram á árlegri galahátíð knattspyrnufólks í Svíþjóð þann 11. nóvember sem sýnt er frá í beinni á TV4. Fjölmiðlafólk og fólk innan sænska knattspyrnusambandsins greiðir atkvæði.

Ramona Bachmann, Christen Press og Marta eru tilnefndar sem bestu leikmenn deildarinnar. Nánari upplýsingar um tilnefningarnar má finna hér.