Real Madrid neitar því að Bale sé með brjósklos

Real Madrid segir ekkert til í frétt Marca í morgun um að Gareth Bale sé kominn með brjósklos en velski vængmaðurinn hefur ekki spilað mikið með spænska stórliðinu síðan að Real Madrid gerði hann að dýrasta knattspyrnumanni heims.

Gareth Bale skoraði í sínum fyrsta heimaleik með Real Madrid en hann hefur aðeins byrjað einn leik síðan að hann kom til Spánar.

Marca sagðist hafa heimildir fyrir því að myndataka frá læknisskoðun leikmannsins 2. september síðastliðinn hafi sýnt fram á brjósklos í baki og að Bale sé í raun tifandi meiðslabomba eins og þeir orða það.

Real Madrid segir leikmanninn vera með bólgu í hryggþófa, sem er brjósklag á milli hryggjarliða, og að slíkt sé mjög algengt meðal fótboltamanna.