Stunginn með notaðri sprautunál

Í dómnum er birt greinargerð lögreglu þar sem vitnisburðir brotaþola koma fram og er atburðum þriggja árása lýst. Tilefni þeirra er sagt vera framhjáhald eins fórnarlambsins með kærustu Stefáns og eru lýsingar á ofbeldi sem hann er grunaður um að hafa framið, afar ógeðfelldar.

Brotaþoli A, sem kveðst hafa upplýst Stefán um framhjáhald kærustunnar með brotaþola B, lýsir því meðal annars að Stefán og annar maður sem einnig er ákærður í málinu, hafi ítrekað stungið hann með eggvopni, kýlt hann í andlitið og lamið í hnéskeljar og handarbök, líklega með hafnaboltakylfu. Þá hafi hann verið stunginn nokkrum sinnum með notaðri sprautunál. Samkvæmt læknisvottorði hlaut viðkomandi m.a. brot á augntóftargólfi og kinnbeini, mar í hársverði og sár á framhandlegg eftir eggvopn.

Brotaþoli B kveðst meðal annars hafa verið bundinn, liggjandi á gólfi og þannig laminn illa, meðal annars með kylfum. Þá eru hinir ákærðu sagðir hafa sprautað eldfimum vökva á viðkvæma líkamshluta B og lagt eld að. Þá hafi hann verið þvingaður til að gleypa pillur og sprauta sig með óþekktu lyfi. Samkvæmt læknisvottorði hlaut brotaþoli B mjög slæma áverka sem benda til misþyrminga í pyntingaskyni.

Stefán sætir að auki ákæru vegna sérstaklega hættulegrar líkamsárásar á kærustu sína. Er honum gert að sök að hafa bundið belti af baðsloppi um háls hennar og dregið hana þannig að henni hafi legið við köfnun.

Í dómi Hæstaréttar kemur fram að brotin, sem leiki sterkur grunur um að ákærði hafi framið, feli í sér stórfelldar líkamsárásir og að það gæti valdið ótta í samfélaginu um áframhaldandi ofbeldisbrot, verði ákærði látinn laus. Hann situr nú í gæsluvarðhaldi til 30. október.