KSÍ afhendir verðlaunin á fimmtudaginn

Knattspyrnusamband Íslands mun gera upp knattspyrnutímabilið á fimmtudagskvöldið kemur en afhending verðlauna fyrir keppnistímabilið 2013 fer þá fram í höfuðstöðvum KSÍ. Keppni í Pepsi-deild karla lauk um síðustu helgi en stelpurnar höfðu lokið keppni 15. september síðastliðinn.

Lokahóf KSÍ hefur verið með breyttu sniði síðustu ár en í fyrra fór það fram í Hörpunni. Að þessu sinni halda KSÍ-menn hófið hjá sér alveg eins og fyrir tveimur árum.

Það eru leikmenn sjálfir sem kjósa bæði besta og efnilegasta leikmanninn í Pepsi-deild karla og kvenna en valnefnd Ölgerðarinnar og KSÍ ákveður einnig nokkur verðlaun.  

Húsið opnar kl. 17:30 á fimmtudaginn en hér fyrir neðan má sjá hvaða verðlaun eru afhent að þessu sinni.

Verðlaunin sem eru afhent í ár:

Markahæstu leikmenn Pepsi-deilda

Viðurkenning Borgunar og KSÍ fyrir heiðarlega framkomu í Pepsi-deildum (valið af  háttvísinefnd KSÍ)

Dómarar ársins í Pepsi-deildum (valdir af leikmönnum)

Stuðningsmenn ársins í Pepsi-deildum (valdir af valnefnd Ölgerðarinnar og KSÍ)

Þjálfarar ársins í Pepsi-deildum (valinn af valnefnd Ölgerðarinnar og KSÍ)

Efnilegustu leikmenn í Pepsi-deildum (valdir af leikmönnum)

Bestu leikmenn í Pepsi-deildum (valdir af leikmönnum)