Húsleit gerð hjá fjölda ítalskra félaga

Enn eitt hneykslið er í uppsiglingu í ítalska boltanum en lögregluyfirvöld þar í landi ruddust inn á skrifstofur hjá 41 félagi þar í morgun.

Um er að ræða félög í öllum deildum. Stóru liðin eru líka undir smásjá yfirvalda en ruðst var inn hjá Juventus, Napoli, AC Milan, Inter, Lazio og Roma meðal annars.

Lögregluyfirvöld eru að rannsaka meðal annars peningaþvætti og skattasvik. Málið er mjög víðfeðmt og liggja erlend félög einnig undir grun en ítalska lögreglan vildi ekki nefna erlendu félögin.

Tólf umboðsmenn eru einnig í rannsókn hjá lögreglunni og ef að líkum lætur eigum við eftir að heyra mikið af þessu máli á næstu vikum.