Benitez ráðinn þjálfari Napoli

Forseti Napoli, Aurelio de Laurentiis, hefur staðfest að Spánverjinn Rafael Benitez taki við sem þjálfari liðsins í sumar. Hann tekur við starfinu af Walter Mazzarri.

Benitez hefur sinnt stöðu bráðabirgðastjóra Chelsea og það er líklega verst geymda leyndarmál fótboltaheimsins að Jose Mourinho taki við Chelsea í sumar.

Mazzarri hefur gert frábæra hluti með Napoli en liðið endaði í öðru sæti deildarinnar og verður í Meistaradeildinni næsta vetur.

"Ég gaf sjálfum mér það í afmælisgjöf að ráða Benitez sem þjálfara næstu tvö árin," sagði De Laurentiis í dag.

Benitez skilur við Chelsea í góðum málum. Hann kom liðinu í Meistaradeildina og vann svo Evrópudeildina með liðinu.