Gamla konan hafði betur

Arturo Vidal skoraði eina markið úr vítaspyrnu þegar Juventus vann 1-0 sigur á AC Milan í stórleik kvöldsins í ítölsku knattspyrnunni.

AC Milan hafði ekki tapað í fjórtán leikjum í röð þegar kom að heimsókninni til Tórínó en uppskera þeirra rauðu og svörtu var rýr í kvöld.

Juventus hefur ellefu stiga forystu á Napólí í toppsæti deildarinnar þegar fimm umferðir eru eftir. Aðeins stórslys kemur í veg fyrir að liðið verji Ítalíumeistaratitil sinn.

AC Milan situr í þriðja sæti deildarinnar, einu stigi á undan Fiorentina sem lagði Tórínó 4-3 í markaleik í Flórens.