Lætur ekki rasistana reka sig úr landi

Þó svo Kevin-Prince Boateng, leikmaður AC Milan, þurfi reglulega að þola kynþáttaníð í ítalska boltanum þá ætlar hann ekki að láta rasistana hafa betur. Hann tekur ekki í mál að hætta að spila í deildinni.

"Mér líður vel hjá Milan. Hér er mitt heimili og ég stefni að því að vera hér mörg ár í viðbót. Stundum hef ég vissulega fengið nóg og hugsað um að fara en ég neita að láta einhverja fjóra til fimm hálfvita flæma mig úr deildinni," sagði Boateng harður.

"Það er alltaf sorglegt þegar svona atvik koma fyrir. Ég skil ekki einu sinni hvernig á því stendur að fólk sé enn með kynþáttaníð á knattspyrnuleikjum."

Nú síðast var Juventus sektað vegna hegðunar félagsins í garð Boateng.