Zanetti neitar að gefast upp

Hinn 39 ára gamli Argentínumaður Javier Zanetti, leikmaður Inter, varð fyrir miklu áfalli um helgina er hann sleit hásin. Óttast margir að glæstum ferli hans sé því lokið.

Það er klárt að Zanetti verður frá í marga mánuði vegna meiðslanna en sjálfur neitar hann að gefast upp og leggja skóna á hilluna.

"Mitt markmið er að koma til baka sterkari en áður. Ég trúi því að það sé hægt. Það þarf að skipta um dekk eftir mikla notkun," sagði Zanetti.

"Það á eftir að taka ákvörðun um hvenær ég fer í aðgerð en ferillinn er ekki búinn. Ég hef fengið góðan stuðning og ætla mér að koma til baka."

Zanetti er búinn að spila yfir 600 leiki í ítölsku úrvalsdeildinni síðan hann kom til félagsins frá Banfield árið 1995.