Þetta er bara fótbolti

Hannes Þór Halldórsson landsliðsmarkvörður á ekki von á öðru en að hann verði í byrjunarliði Íslands gegn Slóveníu á morgun. Hann hefur hagað öllu sínu undirbúningstímabili á Íslandi með þennan leik í huga.

Liðin mætast þá í undankeppni HM 2014 en leikurinn er gríðarlega mikilvægur fyrir bæði lið. Hvorugt hefur í raun efni á að tapa.

Landsliðið hefur haldið til í Ljubljana alla vikuna og undirbúið sig að kappi fyrir leikinn. Hannesi líkar vistin vel.

„Það þarf ekki mikið til að venjast lífinu í Slóveníu. Þetta er eins og hvert annað land og okkur líður vel hérna," sagði Hannes Þór en viðtalið má heyra í heild sinni hér fyrir ofan. „Við erum bjartsýnir og brattir."

Allir þrír markverðir Íslands í þessari ferð spila í Pepsi-deildinni en allir aðrir leikmenn landsliðsins spila í atvinnumannadeildum í Evrópu. Hannes segir eðlilega vera mun á því að æfa með landsliðinu og liði sínu, KR, sem er á miðju undirbúningstímabili á Íslandi.

„Maður finnur alltaf smá mun á því að koma á landsliðsæfingar enda eru þetta bestu leikmenn þjóðarinnar. En þetta er bara fótbolti á endanum og allt sama tóbakið," segir Hannes og brosir.

„En formið á mér er mjög gott og hef ég hagað mínu undirbúningstímabili með þennan leik í huga. Allt hefur miðað að því að vera í toppstandi á þessum tímapunkti. Enda er ég í miklu betra formi en ég er vanur að vera í á þessum árstíma og klár í slaginn."

Hannes hefur verið aðalmarkvörður liðsins undir stjórn Lars Lagerbäck og segist finna fyrir vissu trausti. „Það er eins komið fram við alla markverði í liðinu og aldrei hver er að fara spila fyrirfram. Ég finn þó fyrir ákveðnu trausti og reikna með því að spila leikinn á morgun. Ég lít á það sem svo að ég sé aðalmarkvörðurinn í þessu liði."

Ögmundur Kristinsson, markvörður Fram, fær nú að kynnast lífinu með A-landsliði karla í fyrsta sinn en Hannes segir að honum hafi gengið vel á æfingum með sér og Gunnleifi Gunnleifssyni, markverði Breiðabliks.

„Ömmi er mjög flottur markvörður og er fljótur að stíga inn í þetta umhverfi. Hann hefur staðið sig mjög vel enda markvörður sem er með allan pakkann og getur náð mjög langt. Það er gaman að fylgjast með honum hér."