Mourinho: Heimurinn stoppar til að horfa í kvöld

Jose Mourinho, þjálfari Real Madrid, spáir því að allur heimurinn verði að horfa þegar Real Madrid mætir Manchester United á Old Trafford í kvöld í seinni leik liðanna í sextán liða úrslitum Meistaradeildarinnar. Liðin gerðu 1-1 jafntefli í fyrri leiknum og það er því mikil spenna í loftinu fyrir leik kvöldsins sem verður í beinni útsendingu á Stöð 2 Sport.

„Heimurinn stoppar til að horfa í kvöld. Ég held að væntingar til eins leiks geti ekki verið meiri en fyrir leikinn í kvöld," sagði Jose Mourinho á blaðamannafundi í gær. Hann hefur áður slegið Manchester United út úr Meistaradeildinni á Old Trafford en þá þjálfaði hann Porto.

„Það veit enginn hvað gerist í þessum leik því liðin eru mjög jöfn. Sigrarnir á Barcelona skipta engu máli í þessum leik, annar var í bikarnum og hinn í deildinni sem við getum ekki unnið. Þetta er Meistaradeildin og þetta er allt öðruvísi keppni," sagði Mourinho en Real Madrid kemur inn í leikinn eftir tvo sigra á Barcelona á aðeins nokkrum dögum.

„Auðvitað er samt betra að koma inn í þennan leik þegar leikmennirnir eru ánægðir eftir tvo sigra í röð á erkifjendunum. Þetta er góður tími fyrir okkur," sagði Mourinho.

Síðast þegar liðin mættust í Meistaradeildinni undir svipuðu kringumstæðum í apríl 2003 er almennt talinn vera einn besti leikurinn í sögu keppninnar. Real Madrid komst þá áfram þrátt fyrir 3-4 tap í seinni leiknum á Old Trafford (6-5 samanlagt) en Brasilíumaðurinn Ronaldo skoraði þrennu í leiknum.

„United er á frábæru skriði. Þeir eru komnir inn í átta liða úrslit bikarsins og eru að vinna úrvalsdeildina í mars. Það líða mánuðir á milli tapleikja hjá þeim en við erum líka á góðu skriði á árinu 2013," sagði Mourinho.