Juventus áfram á kostnað Celtic

Ítalíumeistarar Juventus lentu ekki í teljandi vandræðum með skoska liðið Celtic. Juve vann 2-0 í kvöld og 5-0 samanlagt.

Alessandro Matri kom Juventus yfir á 24. mínútu er hann náði að fylgja eftir skoti Fabio Quagliarella. Fraser Foster varði en náði ekki að halda boltanum, sem Matri færði sér í nyt.

Celtic fékk þó nokkur ágæt færi til að jafna leikinn en færði sér þau ekki í nyt. Gianluigi Buffon átti fínan leik í markinu og reyndist Skotunum erfiður.

Juve gerði þó endanlega út um leikinn á 65. mínútu er Quagliarella skoraði auðvelt mark. Andrea Pirlo átti frábæra sendingu á Arturo Vidal inn fyrir varnarlínu Celtic. Vidal tók boltann niður og lagði hann fyrir Quagliarella sem kláraði færið örugglega.

Celtic átti ef til vill meira skilið en að tapa rimmunni með svo stórum mun en Ítalarnir gerðu sitt og kláruðu hana örugglega.