Emil átti þátt í marki en Verona tapaði stigum

Emil Hallfreðsson átti þátt í marki Hellas Verona þegar liðið gerði 1-1 jafntefli við Reggina á útivelli í ítölsku b-deildinni í fótbolta í kvöld.

Emil var þarna að mæta sínum gömlu félögum sem náðu að jafna leikinn á lokakaflanum. Emil var tekin af velli rétt fyrir leikslok.

Emil lagði upp sigurmark liðsins í leiknum á undan og átti stóran þátt í marki Daniele Cacia í kvöld en Cacia kom þá Verona-liðinu í 1-0 á 28. mínútu.

Þannig var staðan þar til á 73. mínútu þegar Gianmario Comi jafnaði og tryggði Reggina jafntefli. Reggina er fjórtán sætum neðar en Verona í töflunni og þetta eru því tvö töpuð stig í toppbaráttunni.

Hellas Verona er áfram í 3. sæti deildarinnar nú einu stigi á eftir Livorno sem situr í öðru sætinu.