Birkir lék er Pescara steinlá

Birkir Bjarnason lék allan leikinn fyrir Pescara sem steinlá á útvelli gegn Sampdoria 6-0 í ítölsku úrvalsdeildinni í dag. Sampdoria var 2-0 yfir í hálfleik.

Liðin voru hlið við hlið í deildinni þegar leikurinn hófst en yfirburðir Sampdoria voru miklir. Heimamenn voru mikið betri í leiknum það tók liðið engu að síður hálftíma að skora fyrsta markið. Brasilíumaðurinn Eder var þar að verki úr vítaspyrnu.

Þremur mínútum fyrir hálfleik skoraði Argentíumaðurinn Mauro Icardi fyrsta mark sitt í leiknum en hann skoraði fjögur mörk í leiknum.

Spánverjinn Pedro Obiang skoraði þriðja mark Sampdoria á 50. mínútu áður en Icardi bætti þremur mörkum við og fullkomnaði niðurlægingu Pescara.

Sampdoria lyfti sér upp í 13. sæti deildarinnar með 24 stig en Pescara situr eftir í 17. sæti með 20 stig aðeins tveimur stigum frá fallsæti.