Vucinic skaut Juve í undanúrslit bikarsins

Juventus er komið í undanúrslit ítölsku bikarkeppninnar eftir dramatískan sigur, 2-1, á AC Milan eftir framlengdan leik.

Milan byrjaði leikinn betur því Stephan El Shaarawy kom liðinu yfir eftir rúmlega fimm mínútna leik. Milan hélt því forskoti ekki lengi því Sebastian Giovinco jafnaði leikinn sjö mínútum síðar.

Meira var ekki skorað í venjulegum leiktíma og því varð að grípa til framlengingar.

Juve byrjaði framlenginguna með látum því Mirko Vucinic kom þeim yfir með marki í fyrri hálfleik framlengingar.

Milan sótti nokkuð í seinni hálfleik framlengingar og fékk dauðafæri mínútu fyrir leikslok sem misfórst. Það reyndist síðasta færi Milan og leikmenn Juve fögnuðu innilega.