Of Monsters setur nýtt met

Fyrsta plata Of Monsters and Men, My Head Is an Animal hefur sett nýtt met á Tónlistanum, samkvæmt Félagi hljómplötuframleiðenda. Hún hefur setið í efsta sæti þessa íslenska sölulista samanlagt í átján vikur, sem er lengri tími en nokkur önnur plata hefur setið frá því listinn var fyrst birtur.

My Head Is an Animal kom út 20. september í fyrra hér á landi og hefur selst í um sautján þúsund eintökum. Hún slær fyrra met Helga Björnssonar og Reiðmanna vindanna og Mugisons sem báðir náðu sautján vikum. Helgi Björns sat reyndar samfleytt í sautján vikur á toppnum en ekki Mugison.

Tónlistinn er unninn fyrir Félag hljómplötuframleiðenda samkvæmt sölugögnum frá verslunum Skífunnar, Eymundsson, Bókabúð Máls og menningar, Hagkaupum, 12 tónum, Bónus, Smekkleysu og Tónlist.is.