Blúshátíð snýr aftur eftir gos

Tvær þekktar blússöngkonur frá Chicago og margir af færustu blústónlistarmönnum landsins stíga á svið á Norden Blues Festival sem verður haldin hátíðleg á Hvoli á Hvolsvelli um hvítasunnuhelgina.

Þetta verður í þriðja sinn sem hátíðin er haldin. Árið 2010 var hætt við hana vegna eldgossins í Eyjafjallajökli og ákveðið var að bíða með að halda hana í fyrra. „Við urðum svolítið öskunni að bráð og frestuðum hátíðinni og svo vorum við ekki með hana í fyrra því við vildum láta allt jafna sig betur," segir Óli Jón Ólason, einn af skipuleggjendunum.

Hann lofar skemmtilegri hátíð. Katherine Davis, sem er ein virtasta blússöngkona Chicago, kemur fram með Blue Ice Band og Grana Louise mætir á blúshátíðina í annað sinn. „Við erum að fá geðveikar bombur frá Chicago. Grana var hjá okkur fyrir þremur árum og hún mælti með þessari konu við okkur," segir Óli Jón og á þar við Katherine Davis.

Einnig koma fram á hátíðinni hljómsveitirnar Stone Stones, Síðasti séns, Tregasveitin og Castro. Tryggvi á Heiði stígur einnig á svið.

-fb