Vidic hvorki með í kvöld né gegn City

Nemanja Vidic verður ekki í liði Manchester United sem mætir Cluj í lokaumferð riðlakeppni Meistaradeildar Evrópu í kvöld. United hefur þegar tryggt sér efsta sæti riðilsins.

Sir Alex Ferguson, knattspyrnustjóri United, gaf í skyn í síðustu viku að Serbinn, sem glímt hefur við hnémeiðsli, yrði með. Skotinn sagði hins vegar á blaðamannafundi í gær að miðvörðurinn myndi ekki spila.

„Honum finnst hann þurfa nokkrar æfingar í viðbót. Hann mun ekki spila í borgarslagnum spili hann ekki á morgun. Ég hafði reyndar ekki reiknað með honum í sunnudagsleikinn hvort eð er," sagði Ferguson.

Ferguson staðfesti hins vegar að Japaninn Shinji Kagawa hefði snúið aftur til æfinga. Kagawa hefur einnig glímt við meiðsli á hné og mun snúa aftur á völlinn innan tíðar.