Birkir spilaði í langþráðum sigurleik

Birkir Bjarnason var í byrjunarliði Pescara í dag og lék allan leikinn er liðið vann langþráðan sigur í ítölsku úrvalsdeildinni.

Pescara skellti þá Genoa, 2-0, á heimavelli. Birkir lék á miðjunni hjá Pescara.

Liðið komst með sigrinum úr botnsætinu og í 18. sætið sem er samt fallsæti. Þetta var fjórði sigur liðsins í vetur en það var búið að tapa fjórum leikjum í röð.

Birkir virðist vera búinn að festa sig í sessi hjá liðinu eftir að nýr þjálfari kom til liðsins. Hann fékk ekkert að spila hjá gamla þjálfaranum.