KR-konur upp í annað sætið

KR er komið upp í annað sætið í Domino´s deild kvenna eftir sannfærandi 26 stiga sigur á Snæfelli, 93-67, í DHL-höllinni í dag. KR-liðið er nú búið að vinna fjóra leiki í röð og komst með þessum sigri upp fyrir Snæfell á innbyrðisviðureignum.

Snæfell var aðeins búið að tapa einum leik á öllu tímabilinu fyrir leikinn í kvöld en Snæfellsliðið átti ekkert svar við leik Vesturbæjarkvenna sem eru heldur betur komnar á flug undir stjórn þjálfarans Finns Freys Stefánssonar.

Patechia Hartman (28 stig) og Sigrún Sjöfn Ámundadóttir (25 stig) áttu frábæran leik í kvöld en saman voru þær með 53 stig í þessum leik. Kieraah Marlow var stigahæst hjá Snæfelli með 24 stig en Hildur Björg Kjartansdóttir skoraði 17 stig.

KR-konur voru með góð tök á leiknum allan tímann en þær voru 18-13 yfir eftir fyrsta leikhlutann og með 21 stigs forystu í hálfleik, 46-25.