Giggs: Svöruðum fyrir klúðrið í fyrra

Man. Utd átti magnaða endurkomu gegn Braga. Seinkun varð á leiknum eftir að það slokknaði á flóðljósunum en þá var staðan 1-0 fyrir heimamenn.

United átti frábærar lokamínútur og skoraði þrjú mörk. Liðið er þar með komið í 16-liða úrslit þó svo tvær umferðir séu eftir af riðlakeppninni.

"Það voru allir í liðinu mjög svekktir yfir því að komast ekki áfram í sextán liða úrslit í fyrra. Við vorum ekki nógu góðir og vissum að við yrðum að gera eitthvað. Við gerðum það," sagði reynsluboltinn Ryan Giggs eftir leikinn.

"Vonandi heldur þetta fína gengi áfram. Það er mikil breidd hjá okkur sem stendur. Það er mikilvægt að hafa hana þegar við erum að spila marga leiki."