Lucio í læknisskoðun hjá Juventus

Brasilíski miðvörðurinn Lucio er á leið til Ítalíumeistara Juventus. Félagið staðfesti að kappinn væri á leið í læknisskoðun á Twitter-síðu sinni í dag.

Lucio, sem var síðast á mála hjá Inter, var ekki boðinn framlenging á samningi sínum og því laus allra mála. Ekki verður hlaupið að því fyrir Lucio að komast í liðið hjá Juventus sem fór ósigrað í gegnum deildina á afstaðinni leiktíð.

Varnarlína Juventus var kjarninn í liði Ítala sem komst í úrslitaleikinn á Evrópumótinu sem lauk á sunnudaginn. Hinn reyndi Lucio á þó vafalítið eftir að reynast gott að hafa til taks á bekknum.

Lucio varð heimsmeistari með Brasilíu árið 2002. Han vann þýsku deildina í þrígang með FC Bayern áður en hann bætti Ítalíumeistaratitli og Meistaradeildartitli í safnið á ótrúlegri leiktíð Inter Milan 2009-2010.