Juventus vann Atalanta örugglega | Töpuðu ekki leik á tímabilinu

Þremur leikjum er ný lokið í ítölsku seríu A-deildinni í knattspyrnu en ítölsku meistararnir í Juventus unnu fínan sigur, 3-1, á Atalanta og fullkomnuðu því tímabilið þar sem félagið tapaði ekki einum einasta leik.

Juventus fór í gegnum heilt tímabil án þess að tapa leik og er það einsdæmi í ítalskri knattspyrnu. Alessandro Del Piero, Luca Marrone og Andrea Barzagli skoruðu allir eitt mark hver fyrir Juventus sem vann ítölsku deildina með nokkrum yfirburðum og enduðu með 84 stig, fjórum stigum á undan AC Milan.

AC Milan lauk tímabilinu með ágætum sigri á Novara , 2-1, á heimavelli en Mathieu Flamini og Filippo Inzaghi gerðu sitt markið hvor fyrir AC Milan í leiknum.

Síðan gerðu Fiorentina og Cagliari markalaust jafntefli en fjölmargir leikir fara fram síðar í dag í ítalska boltanum.