Popovich er þjálfari ársins í NBA-deildinni

Greg Popovich, hinn margreyndi þjálfari San Antonio Spurs, hefur verið valinn þjálfari ársins í NBA-deildinni í körfubolta.

San Antonio náði fyrsta sæti Vesturdeildarinnar en alls vann liðið 50 leiki á tímabilinu. Margir höfðu afskrifað liðið vegna aldurs lykilmanna en annað hefur komið á daginn.

Popovic vann þessi sömu verðlaun árið 2003 en San Antonio varð síðast meistari árið 2007 og alls fjórum sinnum - alla undir stjórn Popovich sem tók við liðinu árið 1996.

Hann gerði þó lítið úr afrekinu í viðtali við fjölmiðla ytra. „Þegar maður fær tækifæri til að fá fyrst David Robinson úr nýliðavalinu og svo Tim Duncan eru góðar líkur á því að maður nái árangri - ekki nema maður klúðri sínum málum algerlega," sagði hann.

„Það er því erfitt að eigna sér hrósið algerlega þegar maður hefur fengið slíkan efnivið í hendurnar."