Xavi: Njótum þess að vera besta lið heims

Miðjumaðurinn Xavi hefur varað Chelsea við því að leikmenn Barcelona séu ekkert að fara að slaka á klónni og ætli sér stóra hluti í Meistaradeildinni í ár rétt eins og síðustu ár.

Barcelona hefur verið afar farsælt undir stjórn Pep Guardiola og er talað um að Barcelona-liðið í dag sé eitt það besta í sögunni.

"Við njótum þess að vera besta lið heims. Það er ekki stimpill sem við settum á okkur sjálfa heldur höfum við náð þeim árangri á vellnum," sagði Xavi.

"Allir stuðningsmenn Barcelona vita hvað það kostaði að koma okkur á þennan stall. Mörg ár án titla en mikil vinna að byggja upp þetta lið."

Barcelona á titil að verja í Meistaradeildinni en liðið lagði Man. Utd í úrslitum keppninnar í fyrra.

"Við getum ekki hætt og viljum ekki hætta. Við erum njóta þessa gullskeiðs okkar með frábærum fótbolta og frábærum sigrum. Við erum að ná árangri sem ekkert lið hefur náð áður eins og að vinna HM félagsliða tvisvar í röð."