Mourinho: Við höfum engu að tapa

Jose Mourinho, þjálfari Real Madrid, segir að það sé engin pressa á sínu liði fyrir leikinn gegn Bayern München í Meistaradeild Evrópu í kvöld.

Þetta er fyrri leikur liðanna í undanúrslitum keppninnar. Real hafði ekki komist í gegnum sextán liða úrslitin sex ár í röð en Mourinho var fljótur að breyta því.

"Við höfum engu að tapa. Það eina sem við getum tapað er Konungsbikarinn sem er okkar. Spænska úrvalsdeildin og Meistaradeildin er ekki okkar. Þannig að við getum aðeins unnið þær keppnir," sagði Mourinho.

"Annars erum við vel undirbúnir fyrir þennan leik. Ég veit hvernig liðið mitt verður og við höfum lagt hart að okkur í undirbúningnum."