Heynckes: Einstakt tækifæri fyrir okkur

Það er mikið undir hjá Bayern München í Meistaradeildinni enda fer úrslitaleikur keppninnar fram á þeirra heimavelli. Þangað vill liðið komast en fyrst þarf Bayern að leggja Real Madrid af velli.

"Það er mikil hvatning í því að úrslitaleikurinn fari fram á okkar heimavelli. Þetta er einstakt tækifæri fyrir okkur," sagði Jupp Heynckes, þjálfari Bayern.

Heynckes þekkir vel til Real Madrid enda var hann þjálfari liðsins er það vann Meistaradeildina árið 1998.

"Ég þekki Real vel og liðið er sérstaklega öflugt í vetur. Spænski boltinn stendur öðrum framar um þessar mundir og Barcelona er auðvitað að skrifa söguna upp á nýtt.

"Þetta verður áhugaverður leikur hjá okkur í kvöld því þarna mætast lið með mikla sögu og eru tvö af stórveldum Evrópuboltans."