Di Matteo: Hefði ekki getað beðið um betri úrslit

Roberto Di Matteo, stjóri Chelsea, var mjög ánægður eftir 1-0 sigur á portúgalska liðinu Bendica í fyrri leik liðanna í átta liða úrslitum Meistaradeildarinnar í kvöld en spilað var á heimavelli Benfica í Portúgal.

„Þetta er frábært og ég hefði ekki getað beðið um betri úrslit. Mér fannst við líta vel út varnarlega," sagði Roberto Di Matteo eftir leikinn en Chelsea liðið hefur unnið tvo fyrstu Meistaradeildarleikina undir hans stjórn.

„Við þurftum að hlaupa og tækla í 90 mínútur og ég valdi leikmenn í liðið sem höfðu orku í það. Þetta er samt ekkert búið því það eru enn eftir 90 mínútur," sagði Di Matteo.

„Við höfum seinni leikinn á heimavelli og munum reyna að komast áfram," sagði Di Matteo að lokum.