Ribery: Þetta voru fullkomin úrslit

Franck Ribery, leikmaður þýska liðsins Bayern München, var mjög kátur eftir 2-0 útisigur á löndum sínum í Olympique de Marseille í kvöld í fyrri leik liðanna í átta liða úrslitum Meistaradeildarinnar.

„Við erum í mjög góðri stöðu. Þetta voru fullkomin úrslit og miklu betri en markalaust jafntefli eða 1-0 sigur," sagði Franck Ribery við Sky Sport í Þýskalandi.

„Við spiluðum mjög agaðan leik og áttum sigurinn skilinn," sagði Ribery en það var púað á hann allan leikinn.

„Það er alltaf erfitt fyrir mig að spila í Frakklandi. Núna spila ég með Bayern og við erum góð fjölskylda. Ég hef verið hér í fimm ár og allt gengur mjög vel," sagði Ribery.

Bayern München er kominn með annan fótinn i undanúrslitin en seinni leikurinn fer fram á Allianz Arena 3. apríl næstkomandi.