Villas-Boas í leynilegum viðræðum við Roma

Það er ansi margt sem bendir til þess að portúgalski þjálfarinn Andre Villas-Boas, sem var rekinn frá Chelsea, fari næst til Ítalíu. Hann hefur lengi verið orðaður við Inter og nú greina fjölmiðlar frá því að hann sé í leynilegum viðræðum við Roma. Hermt er að Villas-Boas hafi hitt Franco Baldini, framkvæmdastjóra Roma, í London.

Baldini þessi var lengi aðstoðarmaður Fabio Capello með enska landsliðið en hætti í október síðastliðnum til að starfa fyrir Roma.

Luis Enrique er núverandi þjálfari Roma og verður tæplega rekinn í vetur en liðið siglir lygnan sjó í sjötta sæti deildarinnar.

Sögusagnir eru um að hann muni taka við Barcelona fari svo að Pep Guardiola stígi frá borði í sumar. Þá vill Roma fá Villas-Boas í staðinn.