Fjölnir fór langt með að bjarga sér með sigri í Hveragerði

Fjölniskonur unnu sex stiga sigur á Hamar í Hveragerði, 77-71, í Iceland Express deild kvenna í kvöld og náðu þar með fjögurra stiga forskoti á Hamar í baráttu liðanna um að sleppa við fall. Hamar getur enn náð Fjölni í síðustu tveimur umferðunum því Hamarskonur eru með betri árangur í innbyrðisviðureignum.

Það voru miklar sveiflur í leiknum því Hamar vann upp sextán stiga forskot Fjölnis og var níu stigum yfir, 66-57, þegar fimm mínútur voru eftir. Fjölnir vann hinsvegar síðustu fimm mínútur leiksins 20-5 og tryggði sér dýrmætan sigur.

Brittney Jones var með 30 stig og 9 stoðsendingar fyrir Fjölni í kvöld, Jessica Bradley var með 24 stig og 17 fráköst og Katina Mandylaris bætti við 10 stigum og 20 fráköstum. Fanney Lind Guðmundsdóttir skoraði 19 stig fyrir Hamar, Katherine Virginia Graham var með 18 stig og 10 stoðsendingar og Marín Laufey Davíðsdóttir skoraði 16 stig og tók 15 fráköst.

Fjölnir komst í 6-0, 9-2 og 16-4 í upphafi leiks og Lárus Jónsson var búinn að taka leikhlé eftir fimm mínútna leik. Hamar kom muninum aftur niður sjö stig (19-12) en Fjölnir var síðan 23-16 yfir eftir fyrsta leikhlutann.

Fjölnisliðið náði mest sextán stiga forskoti í öðrum leikhlutanum (34-18) en hamarskonur unnu síðustu sjö mínútur leikhlutans 16-4 og því munaði bara fjórum stigum á liðunum í hálfleik, 38-34.

Fanney Lind Guðmundsdóttir og Marín Laufey Davíðsdóttir skoruðu báðar 10 stig fyrir Hamar í hálfleiknum en Brittney Jones var með 14 stig og 5 stoðsendingar hjá Fjölni.

Fjölnir tók aftur völdin í byrjun seinni hálfleiks, vann fyrstu sex mínútur leikhlutans 9-2 og komst ellefu stigum yfir, 47-36. Hamar náði að minnka muninn í þrjú stig, 48-51, fyrir lok þriðja leikhlutans og snéri leiknum með frábærri byrjun í þeim fjórða.

Hamar skoraði 11 af fyrstu 12 stigum fjórða leikhlutans og komst sjö stigum yfir, 59-52. Hamar var þá búið að skora 23 stig gegn fimm á aðeins átta mínútna kafla.

Fjölnisliðið gafst ekki upp og tryggði sér sigur með frábærum lokakafla eða með því að vinna fimm síðustu mínútur leiksins 20-5.



Hamar-Fjölnir 71-77 (16-23, 18-15, 14-13, 23-26)

Hamar: Fanney Lind Guðmundsdóttir 19, Katherine Virginia Graham 18/5 fráköst/10 stoðsendingar/6 stolnir, Marín Laufey Davíðsdóttir 16/15 fráköst, Íris Ásgeirsdóttir 7, Samantha Murphy 7/5 fráköst, Álfhildur Þorsteinsdóttir 4/5 fráköst.

Fjölnir: Brittney Jones 30/5 fráköst/9 stoðsendingar, Jessica Bradley 24/17 fráköst, Katina Mandylaris 10/20 fráköst, Birna Eiríksdóttir 5, Bergdís Ragnarsdóttir 4/4 fráköst, Hugrún Eva Valdimarsdóttir 2, Erla Sif Kristinsdóttir 2.