Enrique ætlar að vera hjá Roma í fjögur til fimm ár í viðbót

Spánverjinn Luis Enrique, þjálfari Roma, segir að það sé ekkert hæft í þeim sögusögnum að hann sé á förum frá félaginu í sumar. Hann hefur meðal annars verið orðaður við Barcelona fari svo að Pep Guardiola hætti með Barca í sumar.

Enrique er á sínu fyrsta ári sem aðalþjálfari Roma og hann stefnir á að vera að minnsta kosti fjögur ár í viðbót.

"Maður veit aldrei hvað gerist í fótbolta en ég er maður orða minna og hef ekkert annað í hyggju en að virða samning minn við félagið," sagði Enrique.

"Ég vil gleðja stuðningsmenn félagsins og þeir verða að þola mig í fjögur til fimm ár í viðbót."