Á Icerave segja allir VÁ

Kanilkvöld er yfirskrift nýrra mánaðarlegra danstónlistarkvölda. Annað Kanilkvöldið verður haldið á morgun á Faktorý. Sigurður Arent skipuleggjandi hefur ekki áhyggjur af brjáluðu Icesave-fólki.

 

„Þetta er eitt af mikilvægustu kvöldum Íslandssögu seinni tíma. Það er frábært að hitta á það," segir Sigurður Arent Jónsson, einn skipuleggjenda Kanilkvöldanna sem haldin eru mánaðarlega á Faktorý. Annað Kanilkvöldið verður á morgun, sama kvöld og Íslendingar fá niðurstöðu í Icesave. Af því tilefni fær kvöldið undirheitið Icerave.

 

„Þetta verður bara dansveisla eins og síðast. Við einbeitum okkur ekki að neinum ákveðnum tónlistarstílum, við reynum bara að halda þessu opnu og skemmtilegu," segir Sigurður, sem skipuleggur kvöldin ásamt hópi dansáhugafólks – Kanilsnúðanna eins og þau kalla sig.

 

Sigurður kveðst ekki hafa áhyggjur af því að halda Kanilkvöld á sjálfum Icesave-deginum. Hann óttist það ekki að gestir skiptist í tvær fylkingar og til átaka komi. „Þetta er ópólitísk dansskemmtun," segir Sigurður í léttum tón.

 

En hvort eiga gestir Kanilkvöldanna að segja nei eða já? „Þeir eiga að segja Vá."

 

Sigurður segir að tilurð Kanilkvöldanna megi ekki rekja til þess að danstónlist vanti á börum borgarinnar. Þeir hafi einfaldlega séð tækifæri til að búa til skemmtun fyrir fólk í kringum sig og aðra áhugasama. En er alveg nóg af fólki sem hlustar á danstónlist?

„Ég held það. Þegar svona kreppur skella á sækir fólk í að gleyma sér í trylltum dansi. Árið í ár hefur farið vel af stað hjá fólki sem fílar að dansa og það hefur verið mjög góð dagskrá á Faktorý. Við smellpössum þar inn."

 

hdm@frettabladid.is