Fyndnasti Verzlingurinn fær tækifæri

„Hjólin eru farin að snúast,“ segir Margrét Björnsdóttir, nemandi í Verzlunarskóla Íslands. Margrét vann keppnina fyndnasti Verzlingurinn í síðustu viku.

Á meðal dómara í keppninni voru Dóri DNA og Bergur Ebbi úr grínhópnum Mið-Íslandi, en Margrét falaðist etir að fá að starfa með þeim í viðtali við Fréttablaðið á laugardaginn. Þeir hafa nú boðið henni að vera sérstakur gestur á uppistandskvöldi hópsins í Þjóðleikhúskjallaranum á miðvikudaginn í næstu viku. Margrét segir kvöldið leggjast vel í sig.

„Þetta er algjör snilld – ég er ógeðslega spennt,“ segir hún.

Spurð hvort hún ætli að nota sigurbrandarana úr keppninni í Verzló í Þjóðleikhúskjallaranum segist hún ekki vera viss. „Ég kem kannski með nýja rútínu,“ segir hún.

„Mér fannst hitt höfða meira til framhaldsskólanema og aldurshópsins míns. Þarna verður fólk á öllum aldri og ég vil reyna að höfða til þess. Ég læt kannski brandara um píkuprump vera. Mig langar samt að vera svolítið óviðeigandi.“

Mið-Íslandshópurinn, þeir Ari Eldjárn, Jóhann Alfreð, Dóri DNA og Bergur Ebbi, var með tvö skemmtikvöld í Þjóðleikhúskjallaranum í mars og var uppselt á þau bæði. Þá var Sólmundur Hólm sérstakur gestur, en ásamt Margréti verður enginn annar en Pétur Jóhann Sigfússon gestur í næstu viku.

Margrét er gríðarlega ánægð með að fá að skemmta á sama kvöldi og hann, enda mikill aðdáandi.

Ertu stressuð?

„Nei, það hjálpar mér ekki að vera stressuð,“ segir hún. „Það er best að vera mjög slök – taka þessu með stóískri ró. Mér finnst það langbest.“

Miðasala á skemmtunina fer fram á Midi.is.- afb