Pato vill betri samskipti við þjálfara sinn

Brasilíumaðurinn Alexandre Pato hefur gefið í skyn að honum semji ekkert allt of vel við knattspyrnustjóra sinn hjá AC Milan, Massimiliano Allegri.

Pato hefur verið orðaður við lið í ensku úrvalsdeildinni nokkuð oft á þessu ári og er aldrei að vita hvað gerist nú þegar opnað verður fyrir félagaskipti um áramótin.

„Ég myndi gjarnan vilja að samband mitt við Allegri væri aðeins beinskeyttara," sagði Pato í samtali við ítalska fjölmiðla. „Ég ætla ekki að segja mikið meira en það."

„Ef honum finnst rétt að gagnrýna mig verð ég bara að halda ótrauður áfram. Ég verð að bera virðingu fyrir því sem þjálfarinn segir."

„En staðreyndin er engu að síður sú að hann ætti frekar að tala beint við mig ef honum finnst frammistaða mín ekki nógu góð."