Bikarmeistarar Vals lögðu Stjörnuna

Valskonur komust í undanúrslit Valitor-bikars kvenna í knattspyrnu í kvöld með 1-0 útisigri á Stjörnunni í Garðabæ. Það var Bandaríkjamaðurinn Caitlin Miskel sem skoraði eina mark leiksins í síðari hálfleiknum. Miskel hefur verið iðin við kolann í sumar en þetta var hennar fimmta mark í öllum keppnum.

Liðin mættust í úrslitaleik keppninnar í fyrra þar sem Valskonur höfðu betur og eiga því titil að verja.

Í Vesturbænum vann KR 1-0 sigur á Grindavík. Margrét Þórólfsdóttir skoraði eina markið snemma leiks. Fyrr í kvöld bar Fylkir sigurorð af FH 3-2 í markaleik í Árbænum.

Dregið verður í undanúrslit keppninnar í höfuðstöðvum KSÍ á mánudag.

Haraldur Guðjónsson ljósmyndari Fréttablaðsins og Vísis var í Garðabæ í kvöld og tók nokkrar myndir.

Upplýsingar um markaskorara frá fótbolti.net.