Umfjöllun: Slátrun í Hveragerði

Leik Hamars og Njarðvíkur í undanúrslitum Iceland Express deildarinnar lauk með 83-47 sigri Hamarsstúlkna. Þær tóku því 2-1 forystu í undanúrslitaeinvíginu en vinna þarf þrjá leiki til að komast í úrslitin.

Hamarsstúlkur sem eru deildarmeistarar unnu fyrsta leik liðanna í Hveragerði síðasta laugardag en Njarðvíkurstelpur svöruðu í Ljónagryfjunni og jöfnuðu metin sl. mánudag.

Það voru 342 manns mættir og góð stemming þegar fyrsti leikhluti hófst og skiptust liðin á að halda eins stigs forskoti allt þar til Fanney Lind Guðmundsdóttir setti mikilvægan þrist á flautunni í fyrsta leikhluta sem kom þeim í forystu, 16-14, eftir fyrsta leikhluta.

Segja má að Fanney hafi sett tóninn fyrir liðið sitt en Hamarsstúlkur komu á fljúgandi skriði inn í annan leikhluta og náðu 7-0 leikkafla sem neyddi Sverri Sverrisson, þjálfari Njarðvíkur til að taka leikhlé. Hamarsstúlkur stöðvuðu þó ekki eftir leikhlé og tóku 8-0 kafla sem neyddi Sverri til að taka annað leikhlé. Það tók Njarðvík tæplega sex og hálfa mínútu að skora næsta stig og nýttu Hamarsstúlkur sér vel þetta ástand Njarðvíkurstúlkna og unnu leikhlutann 23-4 og var staðan 39-18 fyrir Hamar í hálfleik.

Hamarsstúlkur héldu áfram uppteknum hætti í þriðja leikhluta og juku á forskotið jafnt og þétt allan leikhlutann, Njarðvík svaraði ágætlega fyrir sig en náðu ekki að minnka mun Hamarsstúlkna og var staðan 64-35 eftir þriðja leikhluta.

Fjórði leikhluti var áframhald á þriðja leikhluta - Njarðvíkurstúlkur léku með hangandi haus og var varnarleikur þeirra mjög opinn. Hamarsstúlkur héldu áfram að auka forskot sitt sem endaði í öruggum 83-47 sigri heimamanna.

Fanney Lind Guðmundsdóttir og Guðbjörg Sverrisdóttir voru atkvæðamestar fyrir Hamar með 16 stig hvor á meðan Julia Demirer skoraði 12 stig/13 fráköst og Dita Liepkalne skoraði 11/12 fráköst.



Hamar-Njarðvík 83-47 (39-18)Hamar: Fanney Lind Guðmundsdóttir 16, Guðbjörg Sverrisdóttir 16/3 varin skot, Kristrún Sigurjónsdóttir 15, Slavica Dimovska 7/10 stoðsendingar, Jenný Harðardóttir 7/4 fráköst, Íris Ásgeirsdóttir 7, Jaleesa Butler 6/12 fráköst/5 stoðsendingar, Þórunn Bjarnadóttir 4/7 fráköst, Regína Ösp Guðmundsdóttir 3, Kristrún Rut Antonsdóttir 2.

Njarðvík : Julia Demirer 12/13 fráköst, Dita Liepkalne 11/12 fráköst, Shayla Fields 10/4 fráköst, Ólöf Helga Pálsdóttir 4, Auður R. Jónsdóttir 3, Sara Dögg Margeirsdóttir 3, Árnína Lena Rúnarsdóttir 2, Emelía Ósk Grétarsdóttir 2.